Bu layihə Naxçıvan Muxtar Respublikasının şimal-şərq hissəsində və Kəpəz–Buzluq–Kürəkçay ərazilərində peyk məlumatları əsasında süni intellekt metodlarından istifadə etməklə hiperspektral məsafədən zondlama tədqiqatlarının aparılması və geoloji analizlərin həyata keçirilməsini əhatə edir. Layihə çərçivəsində hiperspektral peyk məlumatları toplanır və emal olunur, əldə olunan spektral məlumatlar süni intellekt alqoritmləri vasitəsilə analiz edilərək müxtəlif materialların və potensial faydalı qazıntı sahələrinin identifikasiyası həyata keçirilir.
Tədqiqat prosesi zamanı geoloji strukturlar aşkarlanır və təsnif edilir, həmçinin GIS mühitində məkan analizi aparılaraq tematik xəritələr hazırlanır. Əldə olunan analitik nəticələr vizuallaşdırılır və qərarvericilər üçün anlaşılan formada təqdim edilir. Bu yanaşma ənənəvi geoloji tədqiqat metodları ilə müqayisədə daha sürətli və dəqiq nəticələr əldə etməyə, geniş ərazilərin effektiv şəkildə öyrənilməsinə və dəyişikliklərin operativ izlənməsinə imkan yaradır.
Layihə nəticəsində formalaşan məlumatlar təbii resursların səmərəli idarə olunması, potensial ehtiyatların müəyyən edilməsi və gələcək tədqiqatların daha düzgün istiqamətləndirilməsi üçün etibarlı əsas rolunu oynayır.